الكريمي اكسبريس

كتب / خالد شمسان

عليك مراجعة احد فروعنا في عدن هذه رساله استلمتها من الكريمي..

سألت قالوا مبروك معك حوالة روح استلمها واشتري الراشن وثياب لك..

كلمت ابني يروح يستلمها انا ما اقدر اتحرك قال : مايصرفوش الحوالة الا لصاحبها خد بطاقتك واركب انجيز الى الكريمي واستلم حوالتك..

قلت : عسى الله كم هي الحوالة؟

قال : احتمال يكون واحد صاحبك في الخارج حن قلبه وارسل لك بالدولار او باليورو او استرليني او بالسعودي ..

قفزت الحجة وقالت : شل معك ابنك البلاد مليان سرق وانت حالتك حاله ياخالد بايسرقوك وعينك تشوف ..

قلت لها : ليش انا مش رجال؟

يسرقونا وانا اشوف..

قالت : اني نبهتك وانت حر بعدين مافيها شىء تشل ابنك معك..

جلست اطوس بالحوالة وكيف بااتصرف ولمن بااعطي وكم بااخبي للعلاج ؟؟؟؟

سألت نفسي : من اللي ارسل الحوالة ومن فين؟؟

حتى اعرف كم المبلغ؟؟

المهم دورت للبطاقة الاصل وانا انهف من التعب لقيتها اخدتها وحطيتها في جيبي وخرجت من الغرفة وقلت : بااشل حفيدي معي احسن لانه با يقتنع بالف ريال خدمة اما ابني بايقاسمنا الحوالة..

صيحت لحفيدي ومشينا..

نزلت من العمارة وبالغصب لقيت دباب واتفقنا يودينا ويرجعنا بثلاثة الف ريال يمني لان الكريمي قريب من بيتنا..

دخلنا محل الكريمي وكان زحمة وانتظرت على الكرسي وخليت حفيدي يوقف في الطابور .. والدريول كل شوية واجى لي يقول : مالك ياحاج أخرتنا انا اشتي اروح اطلب الله قلت له : قليل وبانوصل ولو بونت باازيدك ياحبوب..

بعد ساعة وصلت للطاقة قلت له : معي حوالة بااسمي خالد محمد احمد شمسان ..

قال : ياحاج كم رقم الحواله ومن المرسل؟

قلت : والله مالي علم احتمال فاعل خير مايشتي اسمه يظهر وضحكت في وجهه..

حن قلبه وفتش الكمبيوتر وقال : حظك مليح لقينا الحوالة ولو كانت مبلغ كبير كنت باارجعك وشفته يعد الفلوس بيده مش بالاله وجعتنا بطني ..

قلت : ليش الحواله باليمني قال وهو يضحك : هي الا الفين ريال ومخصوم منها رسوم الحوالة مأتين ريال امسك الباقي لك الف وثمانمائة وقع لي وتوكل ..

هو الا كمل كلامه وانا غدرت الدنيا في وجهي وماعاد شفت شىء قدامي واجت لي دوخة ..

وقلت : من المرسل ؟

قال : ابراهيم احمد سعيد الرديني من الشيخ عثمان وقعت الاستلام وانا افور مقهور والدريول يقول : مادام الله فتح عليك زيدنا ..

قلت له : شل المبلغ اللي استلمته وفوقه الف ومأتين من الضمار حقي وروح بي ..

سواها ابراهيم فيبي عمل لي مقلب كبير وعاده خصم الرسوم والسبب اننا سلفته الفين ريال وبعدها تقاطعنا ولاننا كنا متقاطعين ومايتكلم معي ارسلها هذا الخبيث حوالة عبر الكريمي..

طيب والله ماراحن لك يارديني..

دخلت البيت والحرمة قدمت لي ورقة فيها طلبات كثيرة وايضا تشتي مأئة الف ريال يمني تشتري بردات وطراريح للبيت..

ضحكت بهستيريا وانا اقول لهم انتم بس منتظرين الدولارات ماعاد قلتوا ايش استوى ؟

وكم استلمت؟

قلت لحفيدي : فهمهم ايش اللي حصل..؟؟

ودخلت غرفتي وطبقت الباب ونمت..!!